ការកន្រ្តាក់បេះដូងថតខាងលើញាប់៖ការណែនាំអំពីការថែទាំ

Atrial Fibrillation: Care Instructions

ការណែនាំអំពីការថែទាំរបស់អ្នក

ការកន្រ្តាក់បេះដូងថតខាងលើញាប់គឺជាចង្វាក់បេះដូងលោតញាប់ និងមិនទៀងទាត់។ ការព្យាបាលស្ថានភាពនេះមានសារៈសំខាន់សម្រាប់ហេតុផលជាច្រើន។ វាអាចបណ្តាលឱ្យមានការកកឈាម ដែលអាចធ្វើដំណើរពីបេះដូងរបស់អ្នក ទៅកាន់ខួរក្បាលរបស់អ្នក និង​បណ្តាល​ឱ្យមានជំងឺគ្រោះថ្នាក់លើសរសៃរឈាមខួរក្បាល។ ប្រសិនបើអ្នកមានចង្វាក់បេះដូងលោតលឿន អ្នកអាចមានអារម្មណ៍ធីងធោង និងល្ហិតល្ហៃ។ ចង្វាក់បេះដូងលោតមិនទៀងទាត់ក៏អាចបង្កើនហានិភ័យរបស់អ្នកចំពោះជំងឺខ្សោយបេះដូងផងដែរ។

ការកន្រ្តាក់បេះដូងថតខាងលើញាប់​ជាញឹកញាប់​បណ្តាល​មក​ពី​ស្ថានភាពជំងឺបេះដូង​ផ្សេងទៀត​ ដូច​ជា​សម្ពាធឈាមខ្ពស់ ឬជំងឺសរសៃឈាមបេះដូង។ ការផ្លាស់ប្តូរដើម្បីកែលម្អស្ថានភាពជំងឺបេះដូងរបស់អ្នកនឹងជួយឱ្យអ្នកមានសុខភាពល្អ និងសកម្ម។

ការ​ថែទាំតាមដាន​ គឺជា​ផ្នែកមួយដ៏សំខាន់ សម្រាប់ការព្យាបាល និង​សុវត្ថិភាព​របស់អ្នក។ សូមប្រាកដ​ថា អ្នកណាត់ជួប និងទៅជួបគ្រូពេទ​គ្រប់ពេល និង​ទូរស​ព្ទទៅ​វេជ្ជបណ្ឌិត​របស់អ្នក​​ប្រសិនបើអ្នក​មានបញ្ហា។ វាក៏ជាគំនិតមួយល្អដែរក្នុងការដឹងអំពីលទ្ធផលធ្វើតេស្តជំងឺ​របស់អ្នក និងរក្សាទុកបញ្ជីថ្នាំដែលអ្នកប្រើ។

តើអ្នកអាចថែទាំខ្លួនអ្នក​នៅផ្ទះបានដោយ​របៀបណា?

ថ្នាំ

• ប្រើប្រាស់ថ្នាំរបស់អ្នកឱ្យបានត្រឹមត្រូវទៅតាមវេជ្ជបញ្ជា។ សូមទូរសព្ទទៅវេជ្ជបណ្ឌិតរបស់អ្នក ប្រសិនបើអ្នកមានបញ្ហាជាមួយឱសថរបស់អ្នក។ អ្នកនឹងទទួលបានព័ត៌មានលម្អិតបន្ថែមអំពីថ្នាំជាក់លាក់ដែលគ្រូពេទ្យបានចេញវេជ្ជបញ្ជា។

• ប្រសិនបើវេជ្ជបណ្ឌិតរបស់អ្នកបានផ្តល់ឱ្យអ្នកនូវថ្នាំពង្រាវឈាមដើម្បីបង្ការគ្រោះថ្នាក់សរសៃឈាមខួរក្បាល សូមប្រាកដ​ថាអ្នកទទួលបានការណែនាំអំពីរបៀបប្រើថ្នាំរបស់អ្នកដោយសុវត្ថិភាព។ ថ្នាំពង្រាវឈាមអាចបណ្តាលឱ្យមានបញ្ហាហូរឈាមធ្ងន់ធ្ងរ។

• កុំប្រើថ្នាំវីតាមីន ថ្នាំដែលគ្មានវេជ្ជបញ្ជា ឬផលិតផលរុក្ខជាតិដោយមិនបានពិភាក្សាជាមួយនឹងវេជ្ជបណ្ឌិតរបស់អ្នកជាមុន។

ការផ្លាស់ប្តូររបៀបរស់នៅ។

• មិនត្រូវជក់បារី។ ការជក់បារីអាចបង្កើនឱកាសនៃគ្រោះថ្នាក់សរសៃឈាមខួរក្បាល និងការគាំងបេះដូង។ ប្រសិនបើអ្នកចង់បានជំនួយផ្តាច់បារី សូម​ពិភាក្សាជាមួយ​វេជ្ជបណ្ឌិតរបស់អ្នកអំពីថ្នាំ និងកម្មវិធីផ្តាច់បារី។ ធ្វើបែបនេះអាចបង្កើនឱកាសរបស់អ្នកក្នុងការផ្តាច់បារីជារៀងរហូត។

• បរិភោគរបបអាហារដែលធ្វើឲ្យបេះដូងមានសុខភាពល្អ។

• រក្សាទម្ងន់ដែលមានសុខភាពល្អ។ សម្រកទម្ងន់ ប្រសិនបើចាំបាច់។

• កំណត់គ្រឿងស្រវឹងត្រឹម 2 កែវក្នុងមួយថ្ងៃសម្រាប់បុរស និង 1 កែវ​ក្នុងមួយ​ថ្ងៃ​សម្រាប់​ស្ត្រី។ ផឹកគ្រឿងស្រវឹងច្រើនពេកអាចបណ្តាលឱ្យមានបញ្ហាសុខភាព។

• ជៀសវាងការផ្តាសាយ និងគ្រុនផ្តាសាយធំ។ ទទួលការចាក់វ៉ាក់សាំងបង្ការជំងឺរលាកសួត។ ប្រសិនបើអ្នកធ្លាប់ចាក់ពីមុនរួច សូមសួរវេជ្ជបណ្ឌិតរបស់អ្នកថាតើអ្នកត្រូវការដូសផ្សេងទៀតដែរឬទេ។ ទទួលការចាក់វ៉ាក់សាំងបង្ការគ្រុនផ្តាសាយធំជារៀងរាល់ឆ្នាំ។ ប្រសិនបើអ្នកត្រូវតែនៅជុំវិញមនុស្សដែលផ្តាសាយ ឬគ្រុនផ្តាសាយធំ សូមលាងដៃឱ្យបានញឹកញាប់។

សកម្មភាព

• ប្រសិនបើវេជ្ជបណ្ឌិតណែនាំវា សូមហាត់ប្រាណបន្ថែម។ ការដើរគឺជាជម្រើស​មួយដ៏ល្អមួយ។ បង្កើនចំនួនជំហានដែលអ្នកដើរជារៀងរាល់ថ្ងៃបន្តិចម្ដងៗ។ ព្យាយាមយ៉ាង​ហោចណាស់ 30 នាទីនៅថ្ងៃភាគច្រើននៃសប្តាហ៍។ អ្នកក៏ប្រហែលជាចង់ហែលទឹក ជិះកង់ ឬធ្វើសកម្មភាពផ្សេងទៀតផងដែរ។ វេជ្ជបណ្ឌិតរបស់អ្នកអាចណែនាំឱ្យអ្នកចូលរួមក្នុង​កម្មវិធីស្តារនីតិសម្បទាបេះដូង ដូច្នេះអ្នកអាចជួយបង្កើនសកម្មភាព​រាងកាយ​របស់អ្នក​ដោយសុវត្ថិភាព។

• ចាប់ផ្តើមធ្វើលំហាត់ប្រាណស្រាលៗ ប្រសិនបើវេជ្ជបណ្ឌិតរបស់អ្នកនិយាយថាមិនអីទេ។ ទោះបីក្នុងចំនួនតិចតួចក៏ដោយ នឹងជួយឱ្យអ្នកកាន់តែរឹងមាំ មានកម្លាំងបន្ថែម និងគ្រប់គ្រងភាពតានតឹង។ ការដើរគឺជាវិធីងាយស្រួលក្នុងការធ្វើលំហាត់ប្រាណ។ ចាប់ផ្តើមដោយការដើរច្រើនបន្តិចជាងពេលដែលអ្នកបានធ្វើនៅក្នុងមន្ទីរពេទ្យ។ បង្កើនជំហានដែលអ្នកដើរបន្តិចម្តងៗ។

• នៅពេលអ្នកហាត់ប្រាណ សូមមើលសញ្ញាដែលបង្ហាញថាបេះដូងអ្នកខំប្រឹងពេក។ អ្នកកំពុងរុញច្រានខ្លួនអ្នកខ្លាំងពេក ប្រសិនបើអ្នកមិនអាចនិយាយខណៈពេលដែលអ្នកកំពុងហាត់ប្រាណ។ ប្រសិនបើអ្នកមានដង្ហើមខ្លី ឬវិលមុខ ឬឈឺទ្រូង សូមអង្គុយចុះ ហើយសម្រាក។

• ពិនិត្យជីពចររបស់អ្នកជាប្រចាំ។ ដាក់ម្រាមដៃពីរនៅលើសរសៃឈាមនៅផ្នែកនៃកដៃរបស់អ្នកស្របតាមមេដៃរបស់អ្នក។ ប្រសិនបើចង្វាក់បេះដូងរបស់អ្នកហាក់ដូចជាលោតមិនស្មើគ្នា ឬលឿន សូមពិភាក្សាជាមួយវេជ្ជបណ្ឌិតរបស់អ្នក។

តើពេលណាដែលអ្នកគួរហៅសុំជំនួយ?

ទូរសព្ទ 911 គ្រប់​ពេល​ដែល​អ្នក​គិត​ថា​អ្នកអាចត្រូវការ​ការថែ​ទាំ​បន្ទាន់។ ឧទាហរណ៍ សូមទូរសព្ទប្រសិនបើ៖

• អ្នកមានរោគសញ្ញានៃជំងឺគាំងបេះដូង។ ទាំងនេះអាចរួមមាន៖ បន្ទាប់ពីអ្នកបានហៅ 911 ប្រតិបត្តិករអាចប្រាប់អ្នកឱ្យទំពារថ្នាំមនុស្សពេញវ័យ 1 គ្រាប់ ឬថ្នាំអាស្ពីរីនដូសទាបពី 2 ទៅ 4 គ្រាប់។ រង់ចាំឡានពេទ្យ។ កុំព្យាយាមបើកបរដោយខ្លួនឯង។

  • ការឈឺទ្រូង ឬសម្ពាធលើទ្រូង ឬអារម្មណ៍ចម្លែកនៅក្នុងទ្រូង។

  • បែកញើស។

  • ការ​ដង្ហក់។

  • ចង្អោរ ឬក្អួត។

  • ការឈឺចាប់ សម្ពាធ ឬអារម្មណ៍ចម្លែកមួយនៅខាងក្រោយ ក ថ្គាម ឬពោះផ្នែកខាងលើ ឬនៅក្នុងស្មា ឬដៃម្ខាង ឬទាំងសងខាង។

  • អារម្មណ៍ធីងធោង ឬល្ហិតល្ហៃភ្លាមៗ។

  • ចង្វាក់បេះដូងលោតលឿន ឬមិនទៀងទាត់។

• អ្នកមានរោគសញ្ញានៃជំងឺដាច់សរសៃឈាមខួរក្បាល។ ទាំងនេះអាចរួមមាន៖

  • ស្ពឹក ស្រពន់ ល្ហិតល្ហៃ ​ឬ​ការបាត់​បង់​ចល​នានៅ​ត្រង់​មុខ ​ដៃ ឬ​ជើងរបស់អ្នកភ្លាមៗ ​ជាពិ​សេស​នៅ​ផ្នែក​ម្ខាងនៃ​រាង​កាយរបស់អ្នក។

  • ការប្រែប្រួល​គំហើញភ្លាមៗ។

  • បញ្ហាភ្លាមៗក្នុងការនិយាយ។

  • ការភាន់ច្រលំភ្លាមៗ ឬបញ្ហាក្នុងការស្វែងយល់ពីសេចក្តីថ្លែងការណ៍សាមញ្ញៗ។

  • បញ្ហាភ្លាមៗជាមួយនឹងការដើរ ឬទប់​លំនឹង​ខ្លួន។

  • ឈឺក្បាលធ្ងន់ធ្ងរភ្លាមៗដែលខុសពីការឈឺក្បាលពីមុន។

• អ្នកបានសន្លប់ (បាត់បង់ស្មារតី)។

សូមហៅទូរសព្ទទៅវេជ្ជបណ្ឌិតរបស់អ្នកភ្លាម ឬស្វែង​រក​ការ​ថែទាំផ្នែក​វេជ្ជសាស្ត្រជាបន្ទាន់ ប្រសិនបើ៖

• អ្នកមានដង្ហើមខ្លីថ្មីៗ ឬកាន់តែខ្លី ។

• អ្នកមានអារម្មណ៍វិលមុខ ឬងងឹតមុខ ឬអ្នកមានអារម្មណ៍ថាអ្នកអាចដួលសន្លប់។

• ចង្វាក់បេះដូងរបស់អ្នកប្រែជាមិនប្រក្រតី។

• អ្នកអាចមានអារម្មណ៍ថាបេះដូងអ្នកកន្ត្រាក់នៅក្នុងទ្រូងរបស់អ្នក ឬចង្វាក់បេះដូងលោតញាប់ពេក។ ប្រាប់គ្រូពេទ្យប្រសិនបើរោគសញ្ញាទាំងនេះថ្មី ឬខ្លាំងជាងនេះ។

តាមដានដោយយកចិត្តទុកដាក់ចំពោះការប្រែប្រួលសុខភាពអ្នក ហើយ​សូម​ប្រាកដថា អ្នកទាក់ទងទៅវេជ្ជបណ្ឌិតរបស់អ្នក ប្រសិន​បើអ្នក​មាន​បញ្ហា​​សុខ​ភាព​ណាមួយ។

បច្ចុប្បន្នជា: 4 តុលា 2023

កំណែមាតិកា: 14.0

ការណែនាំអំពីការថែទាំដែលត្រូវបានកែសម្រួលក្រោមអាជ្ញាប័ណ្ណដោយ អ្នកជំនាញថែទាំសុខភាពរបស់អ្នក។ ប្រសិនបើអ្នកមានសំណួរអំពីស្ថានភាពសុខភាព ឬការណែនាំនេះ សូមសួរអ្នកជំនាញថែទាំសុខភាពរបស់អ្នកជានិច្ច។ Healthwise, Incorporated បដិសេធការធានា ឬការទទួលខុសត្រូវណាមួយសម្រាប់ការប្រើប្រាស់ព័ត៌មាននេះរបស់អ្នក។