រាគ៖ សេចក្តីណែនាំសម្រាប់ការថែទាំ

Diarrhea: Care Instructions

ទិដ្ឋភាពទូទៅ​

ការរាគរូសគឺជាលាមកដែលចេញមកទន់ ហើយមានលាយទឹក (ការធ្វើ​ចលនា​របស់​ពោះ​វៀន​)។ បុព្វហេតុជាក់ស្តែងជាទូទៅគឺពិបាកនឹងស្វែងយល់។ ជួនកាលការរាគគឺជាមធ្យោបាយរបស់រាងកាយរបស់អ្នកក្នុងការកម្ចាត់ចោលនូវអ្វីដែលបង្កឱ្យឈឺពោះ។ វីរុស ការពុលអាហារ និងថ្នាំជាច្រើនអាចបង្កការរាគបាន។ មនុស្សខ្លះរាគដោយឆ្លើយតបទៅនឹងភាពតប់ប្រមល់ផ្លូវអារម្មណ៍ ភាពថប់បារម្ភ ឬអាហារជាក់លាក់។

ស្ទើរតែគ្រប់គ្នាមានជំងឺរាគម្តងម្កាល។ ជាធម្មតាវាមិនធ្ងន់ធ្ងរនោះទេ ហើយលាមករបស់អ្នកនឹងត្រលប់ទៅជាធម្មតាវិញក្នុងពេលឆាប់ៗ។ អ្វីដែលសំខាន់ដែលត្រូវធ្វើគឺជំនួសជាតិទឹកដែលអ្នកបានបាត់បង់ ដូច្នេះអ្នកអាចបង្ការ​ការខ្វះជាតិទឹក។

វេជ្ជបណ្ឌិតបានពិនិត្យអ្នកដោយយកចិត្តទុកដាក់ ប៉ុន្តែបញ្ហាអាចវិវត្តនៅពេលក្រោយ។ ប្រសិនបើអ្នកកត់សម្គាល់ឃើញមានបញ្ហាមួយចំនួន ឬ រោគសញ្ញាថ្មីៗ សូម​ធ្វើ​ការ​​ព្យាបាលជាបន្ទាន់។

ការ​ថែទាំតាមដាន​ គឺជា​ផ្នែកមួយដ៏សំខាន់ សម្រាប់ការព្យាបាល និង​សុវត្ថិភាព​របស់អ្នក។ សូមប្រាកដ​ថា អ្នកណាត់ជួប និងទៅជួបគ្រូពេទ​គ្រប់ពេល និង​ទូរស​ព្ទទៅ​វេជ្ជបណ្ឌិត​របស់អ្នក​​ប្រសិនបើអ្នក​មានបញ្ហា។ វាក៏ជាគំនិតមួយល្អដែរក្នុងការដឹងអំពីលទ្ធផលធ្វើតេស្តជំងឺ​របស់អ្នក និងរក្សាទុកបញ្ជីថ្នាំដែលអ្នកប្រើ។

តើអ្នកអាចថែទាំខ្លួនអ្នក​នៅផ្ទះបានដោយ​របៀបណា?

• ឃ្លាំមើលសញ្ញានៃការខ្សោះជាតិទឹក គឺមានន័យថារាងកាយបាត់បង់ជាតិទឹកច្រើនពេក។ ការខ្សោះជាតិទឹកគឺជាស្ថានភាពធ្ងន់ធ្ងរ ហើយគួរតែទទួលការព្យាបាលភ្លាមៗ។ សញ្ញានៃការខ្សោះជាតិទឹកមាន៖

  • ការស្រេកទឹកខ្លាំងឡើង ហើយភ្នែក និងមាត់ស្ងួត។

  • មានអារម្មណ៍ចង់ដួលសន្លប់ ឬធីងធោង។

  • បរិមានទឹកនោមតិចជាងធម្មតា។

• ដើម្បីបង្ការការខ្សោះជាតិទឹក សូមទទួលទានទឹកឱ្យបានច្រើន។ ជ្រើសរើសទឹក និងសារធាតុរាវផ្សេងទៀតដែលថ្លារហូតទាល់តែអ្នកមានអារម្មណ៍ធូរស្រាល។ ប្រសិនបើអ្នកមានជំងឺតម្រងនោម បេះដូង ឬថ្លើម ហើយត្រូវកំណត់បរិមាណសារធាតុរាវ នោះសូមពិភាក្សាជាមួយវេជ្ជបណ្ឌិតរបស់អ្នកមុននឹងបង្កើនបរិមាណសារធាតុរាវដែលអ្នកផឹក។

• នៅពេលដែលអ្នកមានអារម្មណ៍ចង់ញុំាអាហារ ចាប់ផ្ដើមជាមួយបរិមាណអាហារតិចតួច។

• វេជ្ជបណ្ឌិតអាចណែនាំឱ្យអ្នកលេបថ្នាំគ្មានវេជ្ជបញ្ជាដូចជា loperamide (Imodium) ។ អាន និងអនុវត្តតាមការណែនាំទាំងអស់នៅលើស្លាក។ មិនត្រូវប្រើប្រាស់ថ្នាំនេះនោះទេប្រសិនបើអ្នករាគមានធ្លាក់ឈាម ក្តៅខ្លួនខ្លាំង ឬមានសញ្ញានៃការឈឺធ្ងន់ធ្ងរផ្សេងទៀត។ សូមទូរសព្ទទៅវេជ្ជបណ្ឌិតរបស់អ្នក ប្រសិនបើអ្នកមានបញ្ហាជាមួយឱសថរបស់អ្នក។

តើពេលណាដែលអ្នកគួរហៅសុំជំនួយ?

ទូរសព្ទ 911 គ្រប់​ពេល​ដែល​អ្នក​គិត​ថា​អ្នកអាចត្រូវការ​ការថែ​ទាំ​បន្ទាន់។ ឧទាហរណ៍ សូមទូរសព្ទប្រសិនបើ៖

• អ្នកបានសន្លប់ (បាត់បង់ស្មារតី)។

• លាមករបស់អ្នកមានពណ៌ក្រហមចាស់ ឬមានឈាមច្រើន។

សូមហៅទូរសព្ទទៅវេជ្ជបណ្ឌិតរបស់អ្នកភ្លាម ឬស្វែង​រក​ការ​ថែទាំផ្នែក​វេជ្ជសាស្ត្រជាបន្ទាន់ ប្រសិនបើ៖

• អ្នកវិលមុខ ឬធីងធោង ឬអ្នកមានអារម្មណ៍ថាអ្នកអាចនឹងដួលសន្លប់។

• លាមករបស់អ្នកមានពណ៍ខ្មៅ ហើយមើលទៅដូចជ័រកៅស៊ូថ្នល់ ឬលាមកមានស្នាមឆ្នូតឈាមវែងៗ។

• អ្នកទើបឈឺពោះថ្មីៗ ឬឈឺពោះខ្លាំងជាងមុន។

• អ្នកមានរោគសញ្ញានៃការខ្សោះជាតិទឹក ដូចជា៖

  • ភ្នែកស្ងួត និងមាត់ស្ងួត។

  • ទឹកនោមមានបន្តិចបន្តួច។

  • មិនអាចរក្សាវត្ថុរាវបាន។

• អ្នកទើបតែក្តៅខ្លួន ឬគ្រុនក្តៅខ្លាំងជាងមុន។

តាមដានឲ្យបានដិតដល់រាល់ការប្រែប្រួលសុខភាពរបស់អ្នក ហើយសូមប្រាកដថា ទាក់ទងទៅវេជ្ជបណ្ឌិតរបស់អ្នក ប្រសិនបើ៖

• ការរាគរូសរបស់អ្នកកាន់តែមានភាពធ្ងន់ធ្ងរ។

• អ្នកឃើញមានខ្ទុះនៅក្នុងលាមករាគ។

• អ្នកមិនធូរស្បើយ​ក្រោយ​រយៈពេល 2 ថ្ងៃ (48 ម៉ោង) ។

បច្ចុប្បន្នជា: 19 តុលា 2023

កំណែមាតិកា: 14.0

ការណែនាំអំពីការថែទាំដែលត្រូវបានកែសម្រួលក្រោមអាជ្ញាប័ណ្ណដោយ អ្នកជំនាញថែទាំសុខភាពរបស់អ្នក។ ប្រសិនបើអ្នកមានសំណួរអំពីស្ថានភាពសុខភាព ឬការណែនាំនេះ សូមសួរអ្នកជំនាញថែទាំសុខភាពរបស់អ្នកជានិច្ច។ Healthwise, Incorporated បដិសេធការធានា ឬការទទួលខុសត្រូវណាមួយសម្រាប់ការប្រើប្រាស់ព័ត៌មាននេះរបស់អ្នក។