ជំងឺធ្លាក់ស៖ការណែនាំអំពីការថែទាំ

Bacterial Vaginosis: Care Instructions

ទិដ្ឋភាពទូទៅ​

ជំងឺបាក់តេរីនៅទ្វារមាស៖(Bacterial vaginosis) គឺជាស្ថានភាព​មួយដែល​​មានការលូត​លាស់លើស​នៃ​បាក់តេរី​មួយចំនួន​ដែ​លជាទូទៅត្រូវបានរកឃើញនៅក្នុងទ្វារមាស។ ជារឿយៗ រោគសញ្ញានេះរួមមានការហូរចេញទឹកពណ៌ប្រផេះ ឬពណ៌លឿង​ខុសប្រក្រតីដែល​មានក្លិន "ឆ្អាប" ។ វាមិនត្រូវបានគេចាត់ទុកថាជាការឆ្លងដែលត្រូវបានរីករាលដាលតាមរយៈការប៉ះពាល់ផ្លូវភេទនោះទេ។

រោគសញ្ញានេះអាចជាការរំខាន និងមិនស្រួល។ ប៉ុន្តែជំងឺបាក់តេរីនៅទ្វារមាសមិនបង្កឱ្យមានបញ្ហាសុខភាពផ្សេងទៀតទេ។ ទោះយ៉ាងណាក៏ដោយ ក្នុងករណីខ្លះវាអាចនាំឱ្យមានបញ្ហាធ្ងន់ធ្ងរ។

ទោះបីជាជំងឺបាក់តេរីនៅទ្វារមាសអាចនឹងបាត់​ទៅវិញដោយខ្លួន​ឯងក៏ដោយ ក៏​វេជ្ជបណ្ឌិត​ភាគច្រើន​ប្រើឱសថផ្សះ​ដើ​ម្បីព្យា​បាលវាដែរ។ អ្នកប្រហែលជាត្រូវបានចេញវេជ្ជបញ្ជាជាថ្នាំគ្រាប់ឬក្រែមទ្វារមាស។ ជាមួយនឹងការព្យាបាល ជំងឺបាក់តេរីនៅទ្វារមាសជាធម្មតាសម្អាតក្នុងរយៈពេលពី 5 ទៅ 7 ថ្ងៃ។

ការ​ថែទាំតាមដាន​ គឺជា​ផ្នែកមួយដ៏សំខាន់ សម្រាប់ការព្យាបាល និង​សុវត្ថិភាព​របស់អ្នក។ សូមប្រាកដ​ថា អ្នកណាត់ជួប និងទៅជួបគ្រូពេទ​គ្រប់ពេល និង​ទូរស​ព្ទទៅ​វេជ្ជបណ្ឌិត​របស់អ្នក​​ប្រសិនបើអ្នក​មានបញ្ហា។ វាក៏ជាគំនិតមួយល្អដែរក្នុងការដឹងអំពីលទ្ធផលធ្វើតេស្តជំងឺ​របស់អ្នក និងរក្សាទុកបញ្ជីថ្នាំដែលអ្នកប្រើ។

តើអ្នកអាចថែទាំខ្លួនអ្នក​នៅផ្ទះបាន​តាម​របៀបណា?

• ប្រើអង់ទីប៊ីយ៉ូទិកទៅតាមការណែនាំ។ មិនត្រូវបញ្ឈប់ការប្រើប្រាស់វាដោយសារតែអ្នកមានអារម្មណ៍ធូរស្រាលនោះទេ។ អ្នកចាំបាច់ត្រូវប្រើប្រាស់ឱសថផ្សះឱ្យបានពេញលេញ។

• កុំបរិភោគ ឬផឹកអ្វីដែលមានជាតិអាល់កុល ប្រសិនបើអ្នកកំពុងប្រើថ្នាំ metronidazole ឬ tinidazole ។

• បន្តប្រើថ្នាំរបស់អ្នក ប្រសិនបើអ្នកចាប់ផ្តើមមករដូវរបស់អ្នក។ ប្រើទ្រនាប់ជំនួសឱ្យតំប៉ុង នៅពេលប្រើក្រែមលាប​ទ្វារមាស ឬថ្នាំសុល។ តំប៉ុងអាចស្រូបយកថ្នាំ។

• ស្លៀកសម្លៀកបំពាក់ធ្វើពីកប្បាសដែលរលុង។ កុំស្លៀក​សម្លៀក​បំពាក់​ដែល​ធ្វើឡើង​ពី​នីឡុង និងអ្វីៗផ្សេង​ទៀត​ដែល​ផ្ទុកកម្ដៅ​​ និងសំណើមដល់រាងកាយជាប់​ទៅនឹង​ស្បែក។

• កុំអេះ។ បំបាត់ការរមាស់ដោយប្រើកញ្ចប់ត្រជាក់ ឬងូតទឹកត្រជាក់។

• កុំលាងសម្អាតទ្វារមាសរបស់អ្នកច្រើនជាងម្តងក្នុងមួយថ្ងៃ។ ប្រើទឹកធម្មតា ឬសាប៊ូដុំទន់គ្មានក្លិន។ កុំបាញ់លាងទ្វារមាស។

តើពេលណាដែលអ្នកគួរហៅសុំជំនួយ?

សូមហៅទៅកាន់​វេជ្ជបណ្ឌិតរបស់អ្នកឥឡូវនេះ ឬស្វែងរកការថែទាំវេជ្ជសាស្ត្រជាបន្ទាន់ ប្រសិនបើ៖

• អ្នកគ្រុនក្តៅ។

• អ្នកមានការឈឺចាប់ថ្មី ឬខ្លាំងជាមុននៅក្នុងទ្វារមាស ឬឆ្អឹងអាងត្រគាករបស់អ្នក។

តាមដានឲ្យបានដិតដល់រាល់ការប្រែប្រួលសុខភាពរបស់អ្នក ហើយសូមប្រាកដថា ទាក់ទងទៅវេជ្ជបណ្ឌិតរបស់អ្នក ប្រសិនបើ៖

• អ្នកមានរមាស់ ឬធ្លាក់សតាមទ្វារមាសថ្មី ឬខ្លាំងជាងមុន។

• អ្នកមានការហូរឈាមតាមទ្វារមាសដែលមិនបានរំពឹងទុក។

• អ្នកមិនធូរស្បើយតាមការរំពឹងទុក។

• រោគសញ្ញារបស់អ្នកបានត្រឡប់មកវិញ បន្ទាប់ពីអ្នកបញ្ចប់ការលេបថ្នាំរបស់អ្នក។

បច្ចុប្បន្នជា: 27 វិច្ឆិកា 2023

កំណែមាតិកា: 14.0

ការណែនាំអំពីការថែទាំដែលត្រូវបានកែសម្រួលក្រោមអាជ្ញាប័ណ្ណដោយ អ្នកជំនាញថែទាំសុខភាពរបស់អ្នក។ ប្រសិនបើអ្នកមានសំណួរអំពីស្ថានភាពសុខភាព ឬការណែនាំនេះ សូមសួរអ្នកជំនាញថែទាំសុខភាពរបស់អ្នកជានិច្ច។ Healthwise, Incorporated បដិសេធការធានា ឬការទទួលខុសត្រូវណាមួយសម្រាប់ការប្រើប្រាស់ព័ត៌មាននេះរបស់អ្នក។