ជំងឺប្រគ្រីវ៖ការណែនាំអំពីការថែទាំ

Gout: Care Instructions

ទិដ្ឋភាពទូទៅ​

ជំងឺប្រគ្រីវ គឺជាទម្រង់មួយនៃជំងឺរលាកសន្លាក់ឆ្អឹងដែលបណ្តាល​មក​ពី​ការ​បង្កើត​គ្រី​ស្តាល់អាស៊ីតអ៊ុយរិចនៅក្នុងសន្លាក់។ វាបណ្តាលឱ្យមានការវាយប្រហារភ្លាមៗដោយការឈឺចាប់ ការហើម ការ​ឡើង​ក្រហម និងគាំងសន្លាក់ ​ជា​ទូទៅ​នៅក្នុងសន្លាក់មួយ ជាពិសេស​ម្រាម​មេជើង។

ជាទូទៅជំងឺប្រគ្រីវ កើតឡើងដោយគ្មានមូលហេតុ។ ប៉ុន្តែវាអាចបណ្ដាលមកពី​ការផឹកស្រា (ជាពិសេសស្រាបៀរ) ការ​បរិភោគ ឬ​ផឹក​របស់ដែលធ្វើឡើងពីទឹកពោតដែលមានជាតិស្ករខ្ពស់ ​ឬញ៉ាំអាហារ​​គ្រឿង​សមុទ្រ ឬសាច់ក្រហម។ ការប្រើថ្នាំមួយចំនួនដូចជា ថ្នាំបញ្ចុះទឹកនោម ក៏អាចបង្កឱ្យមានការវាយប្រហារ​ដោយ​ជំងឺប្រគ្រីវ​ផងដែរ។

សូមប្រើថ្នាំរបស់អ្នកទៅតាមវេជ្ជបញ្ជា និងតាមដានជាមួយ​វេជ្ជបណ្ឌិត​របស់អ្នក​ឱ្យបាន​ទៀងទាត់ ​អាចជួយអ្នកឱ្យចៀសវាងការវាយប្រហារពីជំងឺ​ប្រគ្រីវ​​នា​ពេល​អនាគត។

ការ​ថែទាំតាមដាន​ គឺជា​ផ្នែកមួយដ៏សំខាន់ សម្រាប់ការព្យាបាល និង​សុវត្ថិភាព​របស់អ្នក។ សូមប្រាកដ​ថា អ្នកណាត់ជួប និងទៅជួបគ្រូពេទ​គ្រប់ពេល និង​ទូរស​ព្ទទៅ​វេជ្ជបណ្ឌិត​របស់អ្នក​​ប្រសិនបើអ្នក​មានបញ្ហា។ វាក៏ជាគំនិតមួយល្អដែរក្នុងការដឹងអំពីលទ្ធផលធ្វើតេស្តជំងឺ​របស់អ្នក និងរក្សាទុកបញ្ជីថ្នាំដែលអ្នកប្រើ។

តើអ្នកអាចថែទាំខ្លួនអ្នក​នៅផ្ទះបានដោយ​របៀបណា?

• ប្រសិនបើសន្លាក់ហើម សូមដាក់ទឹកកក ឬកញ្ចប់ត្រជាក់នៅលើតំបន់នោះរយៈពេល 10 ទៅ 20 នាទីក្នុងពេលតែមួយ។ ​ដាក់ក្រណាត់​ស្តើង​នៅចន្លោះ​ទឹកកក និងស្បែក​របស់អ្នក។

• បញ្ឈរអវៈយវៈដែលឈឺរបស់អ្នកនៅលើខ្នើយនៅពេលស្អំទឹកកក ឬនៅពេលណាដែលអ្នកអង្គុយ ឬទម្រេតខ្លួនក្នុងរយៈពេល 3 ថ្ងៃបន្ទាប់។ ព្យាយាមរក្សាវាឱ្យខ្ពស់ជាងកម្រិតនៃបេះដូងរបស់អ្នក។ នេះអាចជួយកាត់បន្ថយការហើម។

• សម្រាកសន្លាក់ឈឺ។ ជៀសវាងសកម្មភាពដែលដាក់ទម្ងន់ ឬសំពាធលើសន្លាក់ពីរបីថ្ងៃ។ សម្រាករយៈពេលខ្លីពីសកម្មភាពធម្មតារបស់អ្នកនៅពេលថ្ងៃ។

• ប្រើប្រាស់ថ្នាំរបស់អ្នកឱ្យបានត្រឹមត្រូវទៅតាមវេជ្ជបញ្ជា។ សូមទូរសព្ទទៅវេជ្ជបណ្ឌិតរបស់អ្នក ប្រសិនបើអ្នកមានបញ្ហាជាមួយឱសថរបស់អ្នក។

• លេបថ្នាំបំបាត់ការឈឺចាប់ឱ្យបានត្រឹមត្រូវទៅតាមការណែនាំ។

  • ប្រសិនបើវេជ្ជបណ្ឌិតផ្តល់ឱសថតាមវេជ្ជបញ្ជាដល់អ្នកសម្រាប់ការឈឺចាប់ សូមទទួលទានតាមវេជ្ជបញ្ជា។

  • ប្រសិនបើអ្នកមិនទទួលទានថ្នាំបំបាត់ការឈឺចាប់ដែលមានវេជ្ជបញ្ជាទេនោះ សូមសួរវេជ្ជបណ្ឌិតរបស់អ្នកថាតើអ្នកអាចប្រើថ្នាំដែលពុំចាំបាច់​មាន​វេជ្ជ​បញ្ជា​បានដែរឬទេ។

• ញ៉ាំគ្រឿងសមុទ្រ និងសាច់ក្រហមតិច។

• ចៀសវាងអាហារ ឬភេសជ្ជៈដែលត្រូវបានផលិតជាមួយទឹកពោតដែលមានជាតិស្ករខ្ពស់ ។

• ពិនិត្យជាមួយវេជ្ជបណ្ឌិតមុនពេលសេពគ្រឿងស្រវឹង។

• សម្រកទម្ងន់ ប្រសិនបើអ្នកលើសទម្ងន់អាចជួយកាត់បន្ថយការវាយប្រហារ​ដោយ​ជំងឺប្រគ្រីវ។ ប៉ុន្តែកុំបន្តការសម្រកទម្ងន់ណាដែលធ្វើឱ្យស្រកទម្ងន់យ៉ាងឆាប់រហ័ស។ ការស្រកទម្ងន់ច្រើនក្នុងរយៈពេលដ៏ខ្លីអាចបណ្តាលឱ្យមានការវាយប្រហារជំងឺប្រគ្រីវ។

តើពេលណាដែលអ្នកគួរហៅសុំជំនួយ?

សូមហៅទៅកាន់​វេជ្ជបណ្ឌិតរបស់អ្នកឥឡូវនេះ ឬស្វែងរកការថែទាំវេជ្ជសាស្ត្រជាបន្ទាន់ ប្រសិនបើ៖

• អ្នកគ្រុនក្តៅ។

• មានការឈឺចាប់ខ្លាំងនៅតាមសន្លាក់ ដែលអ្នកមិនអាចប្រើវាបាន។

• អ្នកមានការហើមដោយមិនមានមូលហេតុភ្លាមៗ ឡើងក្រហម មានកម្ដៅ ឬការឈឺចាប់ខ្លាំងនៅក្នុងសន្លាក់មួយ ឬច្រើន។

តាមដានឲ្យបានដិតដល់រាល់ការប្រែប្រួលសុខភាពរបស់អ្នក ហើយ​សូម​ប្រាក​ដថាអ្នកទាក់ទងទៅវេជ្ជបណ្ឌិតរបស់អ្នក ប្រសិនបើ៖

• អ្នកមានការឈឺសន្លាក់។

• រោគសញ្ញារបស់អ្នកមានកាន់តែអាក្រក់ទៅៗ ឬមិនបានប្រសើរឡើងបន្ទាប់ពី 2 ឬ 3 ថ្ងៃ។

បច្ចុប្បន្នជា: 7 តុលា 2023

កំណែមាតិកា: 14.0

ការណែនាំអំពីការថែទាំដែលត្រូវបានកែសម្រួលក្រោមអាជ្ញាប័ណ្ណដោយ អ្នកជំនាញថែទាំសុខភាពរបស់អ្នក។ ប្រសិនបើអ្នកមានសំណួរអំពីស្ថានភាពសុខភាព ឬការណែនាំនេះ សូមសួរអ្នកជំនាញថែទាំសុខភាពរបស់អ្នកជានិច្ច។ Healthwise, Incorporated បដិសេធការធានា ឬការទទួលខុសត្រូវណាមួយសម្រាប់ការប្រើប្រាស់ព័ត៌មាននេះរបស់អ្នក។