វីរុសកូរ៉ូណា (COVID-19)៖ការណែនាំអំពីការថែទាំ
Coronavirus (COVID-19): Care Instructions
ទិដ្ឋភាពទូទៅ
ជំងឺវីរុសកូរ៉ូណា (COVID-19) បង្កដោយវីរុស។ រោគសញ្ញាអាចរួមមាន ក្ដៅខ្លួន ក្អក និងដង្ហើមខ្លី។
វាអាចចម្លងតាមរយៈតំណក់ទឹកល្អិតៗចេញពីការក្អក និងកណ្តាស់ ដកដង្ហើម និងច្រៀង។ វីរុសក៏អាចឆ្លងបាន
នៅពេលដែលមនុស្សមានទំនាក់ទំនងជិតស្និទ្ធិជាមួយអ្នកដែលបានឆ្លងជំងឺនេះផងដែរ។
មនុស្សភាគច្រើនមានរោគសញ្ញាស្រាល និងអាចថែរក្សាខ្លួនឯងនៅផ្ទះជាមួយនឹងថ្នាំ ដើម្បីកាត់បន្ថយរោគសញ្ញា។
សូមពិគ្រោះជាមួយវេជ្ជបណ្ឌិតរបស់អ្នក។ ពួកគេប្រហែលជាត្រូវប្រើថ្នាំដើម្បីជួយការពារជំងឺធ្ងន់ធ្ងរ។
ប្រសិនបើរោគសញ្ញារបស់អ្នកកាន់តែអាក្រក់ទៅៗ អ្នកប្រហែលជាត្រូវការការថែទាំនៅក្នុងមន្ទីរពេទ្យ។
ការព្យាបាលអាចរួមបញ្ចូលទាំងថ្នាំ បូករួមទាំងការគាំទ្រដង្ហើមដូចជា ការព្យាបាលដោយអុកស៊ីសែន ឬបំពង់ខ្យល់។
វាមានសារៈសំខាន់ណាស់ក្នុងការមិនចម្លងវីរុសទៅអ្នកដទៃ។ ប្រសិនបើអ្នកមានជំងឺ COVID-19
សូមពាក់ម៉ាសដែលសមល្មមគ្រប់ពេលវេលាដែលអ្នកនៅជុំវិញមនុស្សផ្សេងទៀត។
នៅឲ្យឆ្ងាយពីអ្នកដទៃនៅពេលអ្នកឈឺ។ ចាកចេញពីផ្ទះរបស់អ្នក
តែក្នុងករណីដែលអ្នកត្រូវការការថែទាំវេជ្ជសាស្ត្រ ឬការធ្វើតេស្ដប៉ុណ្ណោះ។
ការថែទាំតាមដាន គឺជាផ្នែកមួយដ៏សំខាន់ សម្រាប់ការព្យាបាល និងសុវត្ថិភាពរបស់អ្នក។
សូមប្រាកដថា អ្នកណាត់ជួប និងទៅជួបគ្រូពេទគ្រប់ពេល
និងទូរសព្ទទៅវេជ្ជបណ្ឌិតរបស់អ្នកប្រសិនបើអ្នកមានបញ្ហា។
វាក៏ជាគំនិតមួយល្អដែរក្នុងការដឹងអំពីលទ្ធផលធ្វើតេស្តជំងឺរបស់អ្នក និងរក្សាទុកបញ្ជីថ្នាំដែលអ្នកប្រើ។
តើអ្នកអាចថែទាំខ្លួនអ្នកនៅផ្ទះបានដោយរបៀបណា?
-
សម្រាកឱ្យបានច្រើនបន្ថែម។ វាអាចជួយឱ្យអ្នកមានអារម្មណ៍ធូរស្បើយបាន។
-
ពិសារទឹកឱ្យបានច្រើន។ ការធ្វើបែបនះជួយបំពេញជាតិទឹកដែលបានបាត់បង់ដោយសារការក្ដៅខ្លួន។
ជាតិទឹកក៏អាចជួយកាត់បន្ថយការមាស់បំពង់កផងដែរ។
-
អ្នកអាចលេបថ្នាំ acetaminophen (Tylenol) ឬ ibuprofen (Advil, Motrin)
ដើម្បីកាត់បន្ថយជំងឺគ្រុនក្តៅបាន។ វាក៏អាចនឹងជួយសម្រួលដល់ការឈឺសាច់ដុំ និងរាងកាយផងដែរ។ អាន
និងធ្វើតាមការណែនាំទាំងអស់នៅលើស្លាក។
-
ប្រើសារធាតុចាហួយមានជាតិប្រេង លាបលើស្បែកដែលរលាក។ ការធ្វើបែបនេះអាចជួយបាន ប្រសិនបើស្បែកជុំវិញច្រមុះ
និងបបូរមាត់របស់អ្នក ក្លាយទៅជាឈឺដោយការកកិតជាមួយក្រដាសអនាម័យច្រើនដងពេក។
ប្រសិនបើអ្នកប្រើប្រាស់អុកស៊ីសែន សូមប្រើផលិតផលដែលមានជាតិទឹកជំនួសឱ្យចាហួយប្រេង។
-
សូមតាមដានរោគសញ្ញាដូចជា ក្តៅខ្លួន និងដង្ហើមខ្លី។
ធ្វើបែបនេះអាចជួយអ្នកដឹងថាតើអ្នកចាំបាច់ទូរសព្ទទៅវេជ្ជបណ្ឌិតរបស់អ្នកឬអត់។
ធ្វើបែបនេះក៏អាចជួយអ្នកឱ្យដឹងពីពេលវេលាមានសុវត្ថិភាពក្នុងការនៅក្បែរមនុស្សដទៃទៀត។
-
ក្នុងករណីខ្លះ គ្រូពេទ្យអាចណែនាំឱ្យអ្នយទទួល ការវាស់អុកស៊ីសែននៅជីពចរ.
តើអ្នកអាចដាក់ខ្លួននៅដាច់ដោយឡែករបៀបណា នៅពេលដែលអ្នកមានជំងឺ COVID-19?
ប្រសិនបើអ្នកមានជំងឺ COVID-19 មានសកម្មភាពផ្សេងៗដែលអ្នកអាចធ្វើបាន
ដើម្បីបញ្ជៀសការរាលដាលវីរុសទៅកាន់អ្នកដទៃទៀត។
-
នៅផ្ទះ ហើយជៀសវាងការទាក់ទងជាមួយអ្នកដទៃទៀត។
-
កាត់បន្ថយទំនាក់ទំនងជាមួយមនុស្សនៅក្នុងផ្ទះរបស់អ្នក។ ប្រសិនបើអាច នៅក្នុងបន្ទប់គេងដាច់ដោយឡែក
និងប្រើប្រាស់បន្ទប់ទឹកដាច់ដោយឡែក។
-
ពាក់ម៉ាសដែលជិតល្អ នៅពេលដែលអ្នកនៅជុំវិញមនុស្សផ្សេងទៀត។
-
ជៀសវាងទំនាក់ទំនងជាមួយសត្វចិញ្ចឹម និងសត្វផ្សេងទៀត។
-
ខ្ទប់មាត់ និងច្រមុះរបស់អ្នកដោយប្រើក្រដាសអនាម័យ នៅពេលអ្នកក្អក ឬកណ្ដាស់។
បន្ទាប់មកបោះវាទៅក្នុងធុងសំរាមភ្លាម។
-
លាងដៃរបស់អ្នកឱ្យញឹកញាប់ ជាពិសេសបន្ទាប់ពីអ្នកក្អក ឬកណ្ដាស់។ ប្រើសាប៊ូដុំ និងទឹក
ព្រមទាំងត្រដុសដៃយ៉ាងហោចណាស់ 20 វិនាទី។ ប្រសិនបើគ្មានសាប៊ូដុំ និងទឹកទេ
ប្រើទឹកលាងដៃដែលមានជាតិអាកុល។
-
ហាមប្រើសម្ភារផ្ទាល់ខ្លួនក្នុងផ្ទះរួមគ្នា។ សម្ភារទាំងនេះរួមមានសម្ភារលើគ្រែ កន្សែង ពែង និងកែវ
និងសម្ភារបរិភោគ។
-
បោកសម្លៀកបំពាក់ក្នុងទឹកក្ដៅឧណ្ហៗបំផុតចំពោះប្រភេទសាច់ក្រណាត់ដែលអាចបោកបាន ហើយសម្ងួតឱ្យស្ងួតល្អ។
វាមិនអីទេក្នុងការបោកសម្លៀកបំពាក់អ្នកដទៃ ជាមួយសម្លៀកបំពាក់របស់អ្នក។
-
សម្អាត និងសម្លាប់មេរោគក្នុងផ្ទះរបស់អ្នក។ ប្រើប្រាស់សម្ភារសម្អាតផ្ទះ និងក្រណាត់ជូត
ឬស្រ្ពាយបាញ់សម្លាប់មេរោគ។
ប្រសិនបើអ្នកមានសំណួរ សូមចូលទៅកាន់គេហទំព័រ cdc.gov ដើម្បីពិនិត្យមើលឧបករណ៍គណនាចត្តាឡីស័ក
និងដាក់នៅឲ្យដាច់ដោយឡែក។
តើអ្នកអាចបញ្ចប់ការដាក់ខ្លួនឯងឱ្យនៅដាច់ដោយឡែកសម្រាប់ជំងឺ COVID-19 នៅពេលណា?
ប្រសិនបើអ្នកដឹង ឬគិតថាអ្នកបានឆ្លងវីរុស អ្នកនឹងត្រូវដាក់ខ្លួននៅឲ្យដាច់ដោយឡែក។
នៅពេលដែលអ្នកអាចនៅជាមួយមនុស្សជុំវិញខ្លួនផ្សេងទៀតដែលអ្នករស់នៅជាមួយ និងចាកចេញពីផ្ទះ
ដោយអាស្រ័យលើថាតើអ្នកមានរោគសញ្ញាដែរឬទេ។ សារៈសំខាន់៖ ថ្ងៃដែលរោគសញ្ញារបស់អ្នកចាប់ផ្តើម
ឬថ្ងៃដែលអ្នកបានធ្វើតេស្តវិជ្ជមាន។ ថ្ងៃទី 1
គឺជាថ្ងៃបន្ទាប់ពីរោគសញ្ញាចាប់ផ្តើមដំបូងរបស់អ្នក ឬការធ្វើតេស្តរបស់អ្នកវិជ្ជមាន។
ការដាក់ខ្លួននៅដាច់ដោយឡែកចាប់ផ្តើមនៅថ្ងៃដែលឃើញរោគសញ្ញាដំបូង។
ប្រសិនបើអ្នកមានរោគសញ្ញា អ្នកអាចបញ្ចប់ការដាក់ខ្លួននៅដាច់ដោយឡែកនៅចុងបញ្ចប់នៃថ្ងៃទី 5
ប្រសិនបើ អ្នកមិនមានគ្រុនក្តៅក្នុងរយៈពេល 24 ម៉ោង
ខណៈពេលដែលមិនប្រើថ្នាំដើម្បីបញ្ចុះកម្ដៅ ហើយ រោគសញ្ញារបស់អ្នកកំពុងតែប្រសើរឡើង ។
ប្រសិនបើអ្នកបានធ្វើតេស្តវិជ្ជមាន ប៉ុន្តែមិនមានរោគសញ្ញាអ្វីទេ
អ្នកអាចបញ្ចប់ការដាក់ខ្លួននៅដាច់ដោយឡែកនៅចុងបញ្ចប់នៃថ្ងៃទី 5 ។ប៉ុន្តែប្រសិនបើអ្នកចាប់ផ្តើមមានរោគសញ្ញា
សូមអនុវត្តតាមជំហានខាងលើ។ ប្រើថ្ងៃដែលឃើញរោគសញ្ញាដំបូង ជាថ្ងៃទីមួយរបស់អ្នកដែលចេញរោគសញ្ញា។
អ្នកអាចធ្វើតេស្តជំងឺ COVID-19 នៅចុងបញ្ចប់នៃថ្ងៃទី 5។ប្រសិនបើវាវិជ្ជមាន
សូមបន្តដាក់ខ្លួននៅដាច់ដោយឡែករហូតដល់ចុងបញ្ចប់នៃថ្ងៃទី 10 ។
ប្រសិនបើអ្នកមានប្រព័ន្ធភាពស៊ាំចុះខ្សោយ ឬឈឺធ្ងន់
អ្នកប្រហែលជាត្រូវដាក់ខ្លួននៅឲ្យដាច់ដោយឡែករហូតឲ្យបានដល់ 20 ថ្ងៃ។
ប្រសិនបើអ្នកមានសំណួរ សូមចូលទៅកាន់គេហទំព័រ CDC តាម cdc.gov ដើម្បីពិនិត្យមើលឧបករណ៍គណនាចត្តាឡីស័ក
និងដាក់នៅឲ្យដាច់ដោយឡែក។
តើពេលណាដែលអ្នកគួរហៅសុំជំនួយ?
ទូរសព្ទ 911 គ្រប់ពេលដែលអ្នកគិតថាអ្នកអាចត្រូវការការថែទាំបន្ទាន់។ ឧទាហរណ៍ហៅទូរសព្ទ
ប្រសិនបើកូនរបស់អ្នកមានរោគសញ្ញាគំរាមកំហែងដល់អាយុជីវិតដូចជា៖
-
អ្នកពិបាកដង្ហើមខ្លាំង។ (អ្នកមិនអាចនិយាយបានទាល់តែសោះ។)
-
អ្នកមានការឈឺទ្រូង ឬណែនក្នុងទ្រូងជាប់រហូត។
-
អ្នកវិលមុខ ឬធីងធោងខ្លាំង។
-
អ្នកច្របូកច្របល់ ឬមិនអាចគិតបានច្បាស់លាស់។
-
អ្នកមានស្បែក ឬបបូរមាត់ស្លេកស្លាំង ប្រផេះ ឬខៀវ។
-
អ្នកសន្លប់ (បាត់បង់ស្មារតី) ឬពិបាកភ្ញាក់ដឹងខ្លួន។
-
អ្នកមានការបាត់បង់តុល្យភាព ឬបញ្ហាក្នុងការដើរ។
-
អ្នកមានបញ្ហាក្នុងការមើលឃើញចេញពីភ្នែកមួយ ឬទាំងពីរ។
-
អ្នកមានភាពទន់ខ្សោយ ឬដួលទៅផ្នែកម្ខាងនៃមុខ។
-
អ្នកមានភាពទន់ខ្សោយ ឬស្ពឹកនៅក្នុងដៃឬជើង។
-
អ្នកមានបញ្ហាក្នុងការនិយាយ។
-
អ្នកឈឺក្បាលខ្លាំង។
-
អ្នកមានជំងឺប្រកាច់។
សូមហៅទៅកាន់គ្រូពេទ្យរបស់អ្នក ឬស្វែងរកការថែទាំវេជ្ជសាស្ត្រជាបន្ទាន់ ប្រសិនបើ៖
-
អ្នកពិបាកដកដង្ហើមកម្រិតស្រាល។ (ពួកគេមិនអាចនិយាយប្រយោគពេញលេញបានទេ។ )
-
អ្នកកំពុងក្អកចេញឈាម។
-
កូនរបស់អ្នកមានសញ្ញានៃសម្ពាធឈាមទាប។ សញ្ញាទាំងនេះរួមមាន ការមានអារម្មណ៍ធីងធោង
ការខ្សោយខ្លាំងមិនអាចឈរបាន និងការមានជំងឺផ្ដាសាយ ស្លេកស្លាំង និងស្បែកចេញញើស។
តាមដានឲ្យបានដិតដល់រាល់ការប្រែប្រួលសុខភាពរបស់អ្នក ហើយសូមប្រាកដថា ទាក់ទងទៅវេជ្ជបណ្ឌិតរបស់អ្នក ប្រសិនបើ៖
-
រោគសញ្ញារបស់អ្នកកាន់តែអាក្រក់។
-
អ្នកមិនធូរស្បើយតាមការរំពឹងទុក។
-
អ្នកមានរោគសញ្ញាថ្មី ឬកាន់ធ្ងន់ធ្ងរនៃការថប់បារម្ភ ធ្លាក់ទឹកចិត្ត សុបិនមិនល្អ
ឬការគិតឃើញរឿងរ៉ាវចាស់ៗ។
សូមទូរសព្ទ មុនពេលអ្នកទៅកាន់ការិយាល័យរបស់វេជ្ជបណ្ឌិត។ អនុវត្តតាមការណែនាំរបស់ពួកគេ។
ហើយសូមពាក់ម៉ាស។
បច្ចុប្បន្នជា: 28 កុម្ភៈ 2024
កំណែមាតិកា: 14.0
ការណែនាំអំពីការថែទាំដែលត្រូវបានកែសម្រួលក្រោមអាជ្ញាប័ណ្ណដោយ
អ្នកជំនាញថែទាំសុខភាពរបស់អ្នក។ ប្រសិនបើអ្នកមានសំណួរអំពីស្ថានភាពសុខភាព ឬការណែនាំនេះ
សូមសួរអ្នកជំនាញថែទាំសុខភាពរបស់អ្នកជានិច្ច។ Healthwise, Incorporated បដិសេធការធានា
ឬការទទួលខុសត្រូវណាមួយសម្រាប់ការប្រើប្រាស់ព័ត៌មាននេះរបស់អ្នក។