ជំងឺទឹកនោមផ្អែមប្រភេទ 2៖ការណែនាំអំពីការថែទាំ

Type 2 Diabetes: Care Instructions

ការណែនាំអំពីការថែទាំរបស់អ្នក

ជំងឺទឹកនោមផ្អែមប្រភេទទី 2 គឺជាជំងឺមួយដែលវិវត្តនៅពេលដែល​ជាលិកានៃរាងកាយមិនអាច​ប្រើអាំងស៊ុយលីនបានត្រឹមត្រូវ។ យូរៗទៅ លំពែងមិនអាចបង្កើតអាំងស៊ុយលីនគ្រប់គ្រាន់ទេ។ អាំងស៊ុយលីនគឺជាអរម៉ូនដែលជួយ​ឱ្យកោសិកានៃរាងកាយប្រើជាតិស្ករ (គ្លុយកូស) សម្រាប់​ថាមពល។ វាក៏ជួយឱ្យរាងកាយផ្ទុកស្ករបន្ថែម​នៅក្នុងសាច់ដុំ ខ្លាញ់ និងកោសិកា​ថ្លើម​ផងដែរ។

បើគ្មានអាំងស៊ុយលីនទេ ស្ករមិន​អាចចូលក្នុង​កោសិកា​ដើម្បីបំពេញ​ការងារ​របស់វា​បានទេ។ វាស្ថិតនៅក្នុងឈាម​ជំនួស​វិញ។ នេះអាចបណ្តាលឱ្យកម្រិតជាតិស្ករនៅក្នុងឈាមខ្ពស់។ មនុស្សម្នាក់​មានជំងឺទឹកនោមផ្អែម​នៅពេលជាតិស្ករក្នុងឈាមខ្ពស់​ហួសពេក នៅ​ពេលវេលា​ភាគច្រើន។ យូរៗទៅ ជំងឺទឹកនោមផ្អែមអាចនាំឱ្យមានជំងឺនៃបេះដូង សរសៃឈាម សរសៃប្រសាទ តម្រងនោម និងភ្នែក។

អ្នកអាចគ្រប់គ្រងជាតិស្ករក្នុងឈាមរបស់អ្នកដោយស្រកទម្ងន់ ការបរិភោគរបបអាហារដែលមានសុខភាពល្អ និងធ្វើលំហាត់ប្រាណប្រចាំថ្ងៃ។ អ្នកក៏ប្រហែលជាត្រូវលេបថ្នាំ​អាំងស៊ុយលីន ឬថ្នាំទឹកនោមផ្អែមដទៃទៀតដែរ។

ការ​ថែទាំតាមដាន​ គឺជា​ផ្នែកមួយដ៏សំខាន់ សម្រាប់ការព្យាបាល និង​សុវត្ថិភាព​របស់អ្នក។ ត្រូវប្រាកដថាធ្វើ និងទៅតាមណាត់ជួបទាំងអស់។ ទូរសព្ទទៅវេជ្ជបណ្ឌិតរបស់អ្នកប្រសិនបើអ្នកមានបញ្ហា។ វាក៏ជាគំនិតមួយល្អដែរក្នុងការដឹងអំពីលទ្ធផលធ្វើតេស្តជំងឺ​របស់អ្នក និងរក្សាទុកបញ្ជីថ្នាំដែលអ្នកប្រើ។

តើអ្នកអាចថែទាំខ្លួនអ្នក​នៅផ្ទះបាន​តាម​របៀបណា?

• រក្សាជាតិស្ករក្នុងឈាមរបស់អ្នកឱ្យនៅកម្រិតគោលដៅ (ដែលអ្នកកំណត់ជាមួយគ្រូពេទ្យ) ។

  • កាបូអ៊ីដ្រាត - ប្រភពប្រេងថាមពល​​សំខាន់របស់រាងកាយ - មានឥទ្ធិពល​មកលើ​​ជាតិស្ករ​ក្នុងឈាម​ច្រើនជាងសារធាតុចិញ្ចឹម​ដទៃទៀត។ កាបូអ៊ីដ្រាត​​មាននៅក្នុងផ្លែឈើ បន្លែ ទឹកដោះគោ និងយ៉ាអួរ។ វាក៏មាននៅក្នុងនំប៉័ង ធញ្ញជាតិ បន្លែ ដូចជាដំឡូង និងពោត និងអាហារ​មានជាតិស្ករដូចជាស្ករគ្រាប់ និងនំ។ អនុវត្តតាម​ផែនការ​អាហាររបស់អ្នក ដើម្បីដឹងថាតើកាបូអ៊ីដ្រាត​ប៉ុន្មានដែលត្រូវញ៉ាំ​នៅក្នុង​​អាហារមួយពេល និងអាហារសម្រន់នីមួយៗ។

  • កំណត់គោលដៅ​​ហាត់​ប្រាណ​​រយៈពេល 30 នាទី ពិសេស​នៅ​ថ្ងៃធម្មតា​។ ការដើរជាជម្រើស​មួយដ៏ប្រសើរ។ អ្នកក៏អាចធ្វើសកម្មភាពផ្សេងៗទៀតបាន​ផងដែរដូចជា រត់ ហែលទឹក ជិះកង់ ឬលេង​តិននីស ឬកីឡាជាក្រុម។ សូមព្យាយាម​ធ្វើលំហាត់ពង្រឹងសាច់ដុំយ៉ាងហោចណាស់ 2 ដងក្នុងមួយសប្តាហ៍។

  • ប្រើប្រាស់ថ្នាំឱ្យដូចទៅតាមវេជ្ជបញ្ជា។ សូមទូរសព្ទទៅវេជ្ជបណ្ឌិតរបស់អ្នក ប្រសិនបើអ្នកមានបញ្ហាជាមួយឱសថរបស់អ្នក។ អ្នកនឹងទទួលបានព័ត៌មានលម្អិតបន្ថែមអំពីថ្នាំជាក់លាក់ដែលគ្រូពេទ្យបានចេញវេជ្ជបញ្ជា។

• ពិនិត្យជាតិស្ករក្នុងឈាមឱ្យបានញឹកញាប់តាមដែលគ្រូពេទ្យណែនាំ។ វាមានសារៈសំខាន់ក្នុងការតាមដានរោគសញ្ញាណាមួយដែលអ្នកមានដូចជាជាតិស្ករក្នុងឈាមទាប។ សូមប្រាប់គ្រូពេទ្យផងដែរ ប្រសិនបើអ្នកមានការផ្លាស់​ប្តូរសកម្មភាព​របប​អាហារឬការប្រើប្រាស់​អាំង​ស៊ុយលីន។

• ពិភាក្សាជាមួយគ្រូពេទ្យមុនពេលអ្នកចាប់ផ្តើមលេបថ្នាំអាស្ពីរីនជារៀងរាល់ថ្ងៃ។ ថ្នាំអាស្ពីរីនអាចជួយមនុស្សមួយចំនួនកាត់បន្ថយហានិភ័យនៃការគាំងបេះដូង ឬគ្រោះថ្នាក់​សរសៃ​ឈាមខួរក្បាល។ ប៉ុន្តែការលេបថ្នាំអាស្ពីរីនគឺមិនត្រឹមត្រូវសម្រាប់មនុស្សគ្រប់គ្នាទេ ព្រោះវាអាចបណ្តាលឱ្យហូរឈាមធ្ងន់ធ្ងរ។

• មិនត្រូវជក់បារី។ ប្រសិនបើអ្នកចង់បានជំនួយផ្តាច់បារី សូម​ពិភាក្សាជាមួយ​វេជ្ជបណ្ឌិតរបស់អ្នកអំពីថ្នាំ និងកម្មវិធីផ្តាច់បារី។ ធ្វើបែបនេះអាចបង្កើនឱកាសរបស់អ្នកក្នុងការផ្តាច់បារីជារៀងរហូត។

• រក្សាកូលេស្តេរ៉ុល និងសម្ពាធឈាមរបស់អ្នកឱ្យនៅកម្រិតធម្មតា។ អ្នកប្រហែលជាត្រូវប្រើថ្នាំមួយ ឬច្រើនដើម្បីឈានដល់គោលដៅរបស់អ្នក។ សូមប្រើថ្នាំទាំងនោះឱ្យបានត្រឹមត្រូវតាមការណែនាំ។ ហាមឈប់ប្រើ ​ឬផ្លាស់ប្តូរថ្នាំ​​ដោយមិនពិគ្រោះ​​ជាមួយវេជ្ជបណ្ឌិត​របស់អ្នក​ជាមុន។

តើពេលណាដែលអ្នកគួរហៅសុំជំនួយ?

ទូរសព្ទ 911 គ្រប់​ពេល​ដែល​អ្នក​គិត​ថា​អ្នកអាចត្រូវការ​ការថែ​ទាំ​បន្ទាន់។ ឧទាហរណ៍ សូមទូរសព្ទ ប្រសិនបើ៖

• អ្នកបានដួលសន្លប់ (បាត់បង់ស្មារតី) ឬអ្នកងងុយគេង ឬច្របូកច្របល់ភ្លាមៗ។ (អ្នកប្រហែល​ជាមានជាតិស្ករក្នុងឈាមទាបណាស់។ )

សូមហៅទូរសព្ទទៅវេជ្ជបណ្ឌិតរបស់អ្នកភ្លាម ឬស្វែង​រក​ការ​ថែទាំផ្នែក​វេជ្ជសាស្ត្រជាបន្ទាន់ ប្រសិនបើ៖

• ជាតិស្ករក្នុងឈាមរបស់អ្នកគឺ 300 mg/dL ឬខ្ពស់ជាងកម្រិត​ដែលគ្រូ​ពេ​ទ្យបានកំណត់ឱ្យអ្នក។

• អ្នកមានរោគសញ្ញានៃជាតិស្ករក្នុងឈាមទាប ដូចជា៖

  • ការបែកញើស។

  • មានអារម្មណ៍ភ័យ ញ័រ និងខ្សោយ។

  • ភាពអត់ឃ្លានខ្លាំង និងចង្អោរបន្តិចបន្តួច។

  • វិលមុខ និងឈឺក្បាល។

  • ការមើលឃើញព្រាលៗ។

  • ច្របូកច្របល់។

តាមដានឲ្យបានដិតដល់រាល់ការប្រែប្រួលសុខភាពរបស់អ្នក ហើយសូមប្រាកដថា ទាក់ទងទៅវេជ្ជបណ្ឌិតរបស់អ្នក ប្រសិនបើ៖

• ជារឿយៗអ្នកមានបញ្ហាក្នុងការគ្រប់គ្រង​ជាតិស្ករក្នុងឈាមរបស់អ្នក។

• អ្នកមានរោគសញ្ញានៃបញ្ហាជំងឺ​ទឹកនោមផ្អែមរយៈពេលវែងដូចជា៖

  • ការផ្លាស់ប្តូរការមើលឃើញថ្មី។

  • ការឈឺចាប់ថ្មី ស្ពឹក ឬស្រពន់ដៃ ឬជើងរបស់អ្នក។

  • បញ្ហាស្បែក​។

បច្ចុប្បន្នជា: 4 តុលា 2023

កំណែមាតិកា: 14.0

ការណែនាំអំពីការថែទាំដែលត្រូវបានកែសម្រួលក្រោមអាជ្ញាប័ណ្ណដោយ អ្នកជំនាញថែទាំសុខភាពរបស់អ្នក។ ប្រសិនបើអ្នកមានសំណួរអំពីស្ថានភាពសុខភាព ឬការណែនាំនេះ សូមសួរអ្នកជំនាញថែទាំសុខភាពរបស់អ្នកជានិច្ច។ Healthwise, Incorporated បដិសេធការធានា ឬការទទួលខុសត្រូវណាមួយសម្រាប់ការប្រើប្រាស់ព័ត៌មាននេះរបស់អ្នក។